80 ஆண்டுகளுக்குப் பிறகு சூரிய ஒளி மின்சாரம் மூலம் ஒளிரும் கிராமம்

80 ஆண்டுகளுக்கு பிறகு, திரிபுரா மாநிலத்தின் பழங்குடிகள் வாழும் சர்கிபாரா எனும் கிராமம், சூரிய ஒளி மின்சாரத்தின் மூலம் மின் வசதியை பெற்றுள்ளது.

இந்தியா சுதந்திரமடைந்து கிட்டத்தட்ட 75 ஆண்டுகளைக் கடந்துவிட்டது. ஆனாலும்கூட நாட்டின் பல்வேறு பழங்குடியின கிராமங்கள் முழுமையாக மின்சார வசதி, சாலை வசதி என அடிப்படை வசதிகூடப் பெறாமல் இருக்கின்றன. மத்திய அரசின் செயல்பாட்டால், கிட்டத்தட்ட 80 ஆண்டுகளாக இருளில் மூழ்கியிருந்த கிராமம் ஒன்று வெளிச்சம் பெற்றிருக்கிறது.
திரிபுரா மாநிலத்தின் கோவாய் மாவட்டத்தில் பழங்குடிகள் வாழும் சர்கிபாரா எனும் கிராமம், சூரிய ஒளி மின்சாரத்தின் மூலம் மிளிரத் தொடங்கியிருக்கிறது. இதன் மூலம், அந்தக் கிராமத்தின் குழந்தைகள் சூரிய மறைவுக்குப் பின்னரும் மின்சார விளக்குடன் படிக்கத் தொடங்கியிருக்கின்றனர்.
இது குறித்துப் பேசிய அரசு அதிகாரியொருவர், ``கிராமங்களுக்கு மின்சாரம் வழங்குவதற்காகக் கடந்த ஆண்டு திரிபுராவின் 11 தொலைதூர கிராமங்களில் தலா 2 கிலோவாட் மைக்ரோகிரிட் மின் நிலையம் நிறுவப்பட்டது. இந்தத் திட்டத்தை அதிகாரபூர்வமாக கடந்த ஜூலை 30 அன்று பிரதமர் மோடி தொடங்கிவைத்தார்” என்று அவர் கூறினார்.
மேலும் இது தொடர்பாக கிராமவாசி ஒருவர் கூறுகையில், ``அதரமுரா மலைத்தொடரில் அமைந்திருக்கும் இந்த சோலார் ஆலை, கிராமத்தின் வாழ்க்கை முறையை மாற்றியமைத்திருக்கிறது. இதனால், இரவில்கூட கைவினைப் பொருள்கள் செய்யலாம். பெண்கள் ரைசா, பச்சராவை (பழங்குடி பெண்கள் அணியும் ஆடைகள்) நெய்யலாம். மாலையில் ஒன்றுகூடி டி.வி பார்க்கலாம்" என மகிழ்ச்சியை வெளிப்படுத்தினார்.