ரெயில் பயணத்தில் சந்திக்கும் பிரச்சினைகளுக்கு 'ரெயில் மதாத்' செயலி மூலம் 37 நிமிடத்தில் தீர்வு காணப்படும் என தெற்கு ரயில்வே தெரிவித்துள்ளது.
இது தொடர்பாக தெற்கு ரெயில்வே செய்திக்குறிப்பு வெளியிட்டுள்ளது. அதில், பயணிகளின் குறைகளுக்கு உடனடி தீர்வு கண்டிட 2019-ம் ஆண்டு முதல் ரெயில் மதாத் என்ற செயலியை அறிமுகப்படுத்தி குறைகளை குறித்த காலத்தில் தீர்த்து வருகிறது. இந்த செயலி மூலம் குறுஞ்செய்தி, தொலைபேசி, சமூக ஊடகம், போன்றவற்றிலிருந்து பெறப்படும் பயணிகளின் குறைகள் களையப்படுகின்றன.
2021-ம் ஆண்டு ஏப்ரல் முதல் தெற்கு ரெயில்வே 'ரெயில் மதாத்' மூலம் பயணிகள் குறைகளுக்கு 37 நிமிடத்தில் தீர்வு கண்டு வருகிறது. 2022-23-ம் நிதி ஆண்டில் ஜனவரி மாதம் வரை 75,613 பயணிகள் குறைகளுக்கு தீர்வு காணப்பட்டுள்ளது. கடந்த ஏப்ரல் முதல் மார்ச் வரையிலான 2021-22-ம் நிதியாண்டில் 31,450 குறைகள் மட்டுமே பதிவு பெற்று தீர்வு பெற்றுள்ளது குறிப்பிடத்தக்கது என்று அதில் கூறப்பட்டுள்ளது.
