தமிழகத்தில் புத்தாண்டு கொண்டாட்டத்துக்கு எந்த கட்டுப்பாடுகளும் இல்லை என சுகாதாரத் துறை அமைச்சர் தெரிவித்துள்ளார்.
கரோனா பரவலால் கடந்த 2021, 22-ம்ஆண்டு புத்தாண்டு கொண்டாட்டங்களுக்கு பல்வேறு கட்டுப்பாடுகள் விதிக்கப்பட்டன. தமிழகத்தில் கரோனா தொற்று தினசரி பாதிப்பு 10-க்கு கீழ் சென்றதால், 2023-ம் ஆண்டு புத்தாண்டு கொண்டாட்டத்துக்கு அனைவரும் தயாராகி வருகின்றனர். இதற்கிடையே, சீனா அமெரிக்கா உள்ளிட்ட நாடுகளில் ஒமிக்ரான் பிஎஃப் 7 கரோனா வைரஸ் பரவி வருவதால், பல்வேறு முன்னெச்சரிக்கை நடவடிக்கைகளை மத்திய மாநில அரசுகள் எடுத்துவருகின்றன.
இது குறித்து சென்னையில் செய்தியாளர்களிடம் தமிழக சுகாதாரத் துறை அமைச்சர் மா.சுப்பிரமணியன் கூறுகையில், புத்தாண்டு, சமய விழாக்கள், அரசியல் கட்சிகள் நடத்தும் நிகழ்ச்சிகள் என எதற்கும் கட்டுப்பாடுகள் இல்லை. பொது இடங்களில் முகக் கவசம் அணிவது, தனிமனித இடைவெளியை கடைபிடிப்பது ஆகியவை கரோனா விதிமுறைகளில் இன்னமும் இருக்கிறது. அதற்கு எந்த விலக்கும் அளிக்கப்படவில்லை. எனவே, எந்த நிகழ்ச்சியாக இருந்தாலும் கரோனா விதிமுறைகளை மக்கள் அவசியம் கடைபிடிக்க வேண்டும் என்றார்.
