உலகப் புகழ்பெற்ற முதலீட்டாளர் வாரன் பஃபெட் தனது பெர்க்ஷயர் ஹாத்வே நிறுவனம் வைத்திருக்கும் பேங்க் ஆப் அமெரிக்கா பங்குகளை தொடர்ந்து விற்று வருகிறார். கடந்த ஜூலை மாதத்திலிருந்து இந்த விற்பனை தொடங்கப்பட்ட நிலையில், இந்த வாரமும் பங்குகள் விற்பனை செய்யப்பட்டுள்ளது. இந்த முறை, $338 மில்லியன் மதிப்புள்ள பங்குகள் விற்பனை செய்யப்பட்டுள்ளன.
இதுவரை நடத்தப்பட்ட 13 சுற்று விற்பனையில் இது மிகக் குறைந்த அளவு. முன்னதாக, ஒவ்வொரு சுற்றிலும் சராசரியாக $750 மில்லியன் மதிப்புள்ள பங்குகள் விற்பனை செய்யப்பட்டன. இந்த முறை விற்பனை செய்யப்பட்ட பங்குகளின் சராசரி விலை $39.40 ஆகும். இது முன்னதாக விற்பனை செய்யப்பட்ட விலையை விட குறைவு. வாரன் பஃபெட் ஏன் இந்த பங்குகளை தொடர்ந்து விற்பனை செய்கிறார் என்பது குறித்த அதிகாரப்பூர்வமான தகவல் எதுவும் வெளியாகவில்லை. இருப்பினும், இன்னும் பெர்க்ஷயர் ஹாத்வே நிறுவனம் பேங்க் ஆப் அமெரிக்காவின் மிகப்பெரிய பங்குதாரராகவே உள்ளது. தற்போது அவர்கள் வைத்திருக்கும் பங்குகளின் மதிப்பு $31 பில்லியனை தாண்டுகிறது.
