நாட்டில் 2009-ம் ஆண்டில் இருந்து இதுவரை 71 எம்.பி.க்களின் சொத்து மதிப்பு சராசரியாக 286 சதவீதம் உயர்ந்து உள்ளது என அறிக்கை தெரிவிக்கின்றது.
இதுகுறித்து ஜனநாயக சீர்திருத்தங்களுக்கான கூட்டமைப்பு அறிக்கை வெளியிட்டுள்ளது. அதில், நாடாளுமன்ற மக்களவைக்கு 2009-ம் ஆண்டில் இருந்து 2019-ம் ஆண்டு வரை மீண்டும் தேர்ந்தெடுக்கப்பட்ட 71 எம்.பி.க்களின் சொத்து மதிப்பு சராசரியாக 286 சதவீதம் உயர்ந்துள்ளது என தெரிவித்துள்ளது. இவர்களில் பா.ஜ.க.வின் ரமேஷ் சந்தப்பா ஜிகாஜிநாகி என்பவரது சொத்து மதிப்பே அதிகளவில் அதிகரித்துள்ளது என அறிக்கை தெரிவிக்கின்றது. அவரது சொத்து மதிப்பு 2009-ம் ஆண்டில் ரூ.1.18 கோடியாக இருந்தது. அது 2014-ம் ஆண்டில் ரூ.8.94 கோடியாகவும் மற்றும் 2019-ம் ஆண்டில் ரூ.50.41 கோடியாகவும் உயர்ந்துள்ளது. இது ஒட்டுமொத்த அளவில் 4,189 சதவீதம் ஆகும்.
பா.ஜ.க.வின் மற்றொரு கர்நாடகா எம்.பி.யான பி.சி. மோகன் இந்த சொத்து உயர்வு பட்டியலில் 2-வது இடம் பிடித்துள்ளார். அவரது சொத்து மதிப்பு 2009-ம் ஆண்டில் ரூ.5.37 கோடியாகவும், 10 ஆண்டுகளில் 2019-ம் ஆண்டில் ரூ.75.55 கோடியாகவும் அதிகரித்துள்ளது. இது 1,306 சதவீதம் ஆகும் என்று கூறப்பட்டுள்ளது.
