ஆட்டோ கட்டணத்தை மாற்றியமைக்க வேண்டும்: தொழிற்சங்கத்தினர் வலியுறுத்தல்

ஆட்டோ கட்டணத்தை விரைவில் மாற்றியமைக்க வேண்டும் என போக்குவரத்துத் துறை அமைச்சரிடம் ஓட்டுநர் தொழிற்சங்கத்தினர் வலியுறுத்தியுள்ளனர்.

உரிமைக் குரல் ஓட்டுநர் தொழிற்சங்கத்தின் சார்பாக பொதுச் செயலாளர் அ.ஜாஹிர் ஹுசைன், மண்டல செயலாளர் மு.மகேஷ் மற்றும் ஆட்டோ தொழிற்சங்க கூட்டமைப்பு சங்க நிர்வாகள் ஆகியோர் சென்னையில் போக்குவரத்துத் துறை அமைச்சர் சா.சி.சிவசங்கர், உள்துறைச் செயலாளர், போக்குவரத்துத் துறை ஆணையர் உள்ளிட்ட அதிகாரிகளை நேரில் சந்தித்து பேசினர்.

அப்போது பேசுகையில், ஆட்டோ மீட்டர் கட்டணத்தை மாற்றியமைக்க வேண்டும். கேரள அரசைப் போல் தமிழக அரசும் வாடகை வாகன முன்பதிவு செயலியைத் தொடங்க வேண்டும் எனவும், தமிழகத்தில் தொடர்ந்து நிலவி வரும் ரிப்ளக்டிவ் ஸ்டிக்கர் பிரச்சினை தொடர்பாகவும் வலியுறுத்தப்பட்டது.

பின்னர் செய்தியாளர்களிடம் சங்க நிர்வாகிகள் கூறுகையில், விரைவில் ஆட்டோ கட்டணம் மாற்றியமைக்கப்படும். தமிழக அரசு சார்பாக முன்பதிவு செயலியை தொடங்குவதற்கான முதற்கட்ட பணிகள் தொடங்கப்பட்டுள்ளதாக அமைச்சர் சிவசங்கர் மற்றும் துறை சார்ந்த அதிகாரிகள் தெரிவித்தாக அவர்கள் கூறினர்.