பார்தி எண்டர்பிரைசஸ்-ன் முதலீட்டுப் பிரிவான பார்தி குளோபல், இங்கிலாந்தின் மிகப்பெரிய பிராட்பேண்ட் மற்றும் மொபைல் நிறுவனமான BT குழுமத்தில் 24.5% பங்குகளை வாங்குவதற்கான ஒப்பந்தத்தில் கையெழுத்திட்டுள்ளது. இந்த ஒப்பந்தம் சுமார் $4 பில்லியன் மதிப்புடையது. மேலும், பார்தி டெலிவென்ச்சர்ஸ் UK மூலம் பங்குகள் வாங்கப்படும் என்று தெரிவிக்கப்பட்டுள்ளது.
பார்தியின் வெளிநாட்டு முதலீடுகளில் இதுவரை இல்லாத மிகப்பெரிய ஒப்பந்தம் இதுவாகும். பார்தி மற்றும் பிடி நீண்ட காலமாக தொலைத்தொடர்புத் துறையில் ஒத்துழைத்து வருகின்றன. இந்த முதலீடு இரு நிறுவனங்களின் உறவை மேலும் வலுப்படுத்துவதாக இந்த ஒப்பந்தம் உள்ளது. அத்துடன், இந்த ஒப்பந்தம், இந்தியா மற்றும் இங்கிலாந்து இடையே, தொலைத்தொடர்பு, செயற்கை நுண்ணறிவு (AI) மற்றும் 5G தொழில்நுட்பங்களில் ஒத்துழைப்பை மேம்படுத்தும். இந்தியாவில் 5G நெட்வொர்க்கை விரிவுபடுத்துவதற்கும், AI தொழில்நுட்பங்களை மேம்படுத்துவதற்கும் பார்திக்கு இது உதவும். அதே சமயத்தில், BT-க்கு நிதி உதவி கிடைப்பதோடு, இந்திய சந்தையில் தனது இருப்பை வலுப்படுத்திக்கொள்ள உதவும். அத்துடன், இந்த ஒப்பந்தம், உலகளாவிய தொலைத்தொடர்புத் துறையில் ஒருங்கிணைப்பை அதிகரிக்கும்.
