தாஜ் மஹாலுக்கு வெடிகுண்டு மிரட்டல் விடுக்கப்பட்டுள்ளது.
இந்தியாவில் சமீபத்தில் பள்ளிகள், கல்லூரிகள் மற்றும் விமானங்களுக்கு வெடிகுண்டு மிரட்டல்கள் அடிக்கடி ஏற்பட்டு வருகின்றன. இந்த மிரட்டல்கள் காரணமாக பொதுமக்கள் மற்றும் அதிகாரிகள் வீண் பதற்றங்களை சந்தித்து, தேவையற்ற நேர விரயம் மற்றும் அச்சம் ஏற்படுகின்றன. தற்போது, உலகின் புகழ்பெற்ற சுற்றுலாத் தலமான தாஜ் மஹாலுக்கு வெடிகுண்டு மிரட்டல் விடுக்கப்பட்டது. உத்தரப் பிரதேசம், ஆக்ராவில் அமைந்துள்ள தாஜ்மஹால், இந்தியா மட்டுமின்றி உலகம் முழுவதிலும் இருந்து சுற்றுலாப் பயணிகளை ஈர்க்கும் இடமாக அமைந்துள்ளது. இந்த மிரட்டல் காரணமாக, தாஜ் மஹாலை சுற்றி உள்ள நுழைவு வாயில்களை மூடி, சுற்றுலா பயணிகளை உடனடியாக வெளியேற்றிவிட்டனர். மின்னஞ்சல் வழியாக வந்த மிரட்டலின் பின்னர், வெடிகுண்டு நிபுணர்கள் மற்றும் போலீசார் மோப்ப நாய் உதவியுடன் தாஜ் மஹாலில் அனைத்து இடங்களையும் சோதனை செய்தனர். சோதனை முடிவில், வெடிகுண்டுகள் எதுவும் கண்டுபிடிக்கப்படவில்லை. மேலும் மிரட்டல் விடுத்த நபரின் அடையாளம் அறியப்படாத நிலையில், போலீசார் விசாரணை நடத்தி வருகின்றனர்.
