இஸ்ரோ தலைவர் எஸ் சோம்நாத், சந்திரயான்-4 மற்றும் -5 திட்டங்களுக்கான வடிவமைப்புகள் முடிவடைந்துவிட்டதாகவும், அரசின் ஒப்புதலை எதிர்நோக்கி இருப்பதாகவும் தெரிவித்துள்ளார். மேலும், “அடுத்த 5 ஆண்டுகளில் நேவிகேஷன், வானிலை, தொலைநிலை உணர்தல் மற்றும் குவாண்டம் தொழில்நுட்பங்கள் உள்ளிட்ட பல்வேறு துறைகளில் 70 செயற்கைக்கோள்களை விண்ணில் செலுத்த இஸ்ரோ திட்டமிட்டுள்ளது. அத்துடன், வெள்ளி கிரகத்திற்கான விண்வெளி பயண திட்டமும் ஆய்வில் உள்ளது” என்று கூறியுள்ளார். இந்த அறிவிப்புகள், இந்தியாவின் விண்வெளி ஆராய்ச்சித் துறை வேகமாக வளர்ந்து வருவதைக் காட்டுகிறது.
“நிலவில் இருந்து மாதிரிகளை சேகரித்து பூமிக்கு கொண்டு வரும் சந்திரயான்-4 திட்டம் 2028-ம் ஆண்டுக்குள் நிறைவு பெறும் என எதிர்பார்க்கப்படுகிறது. ககன்யான் திட்டத்தின் முதல் பணி டிசம்பர் மாதத்தில் நடைபெறும் என அறிவிக்கப்பட்டுள்ளது. இந்த திட்டத்திற்கான அனைத்து கூறுகளும் ஸ்ரீஹரிகோட்டாவில் இறுதி ஒருங்கிணைப்பு நிலையை நெருங்கிவிட்டன.” - இவ்வாறு சோம்நாத் தெரிவித்தார்.
