சர்வதேச விண்வெளி செயலி உருவாக்கும் போட்டியில் சென்னையை சேர்ந்த குழு சாதனை படைத்துள்ளது.அயர்லாந்தில் சர்வதேச விண்வெளி செயலிகள் உருவாக்கும் ஹேக்கத்தான் போட்டி தலைநகர் டப்ளின் பகுதியில் நடைபெற்றது. இதில் சென்னையை சேர்ந்த ராபின் வில்லியம் உட்பட ஐந்து பேர் கொண்ட குழு பங்கெடுத்தது. இதில் 48 மணி நேரத்தில் நிலவில் ஏற்படும் நில நடுக்கங்களை விண்வெளி ஆராய்ச்சியாளர்கள் விரிவாக அறிந்து கொள்ளும் வகையில் செரிட்வின் என்ற இணைய செயலி வடிவமைக்கப்பட்டது. இந்த படைப்பாற்றலை பாராட்டிய தேர்வு குழு அவர்களுக்கு அயர்லாந்தின் தேசிய வெற்றியாளராக அறிவித்ததோடு நாசாவின் சர்வதேச வேட்பாளராகவும் தேர்ந்தெடுத்து சிறப்பித்துள்ளது. இதனைத் தொடர்ந்து டப்ளின் லார்ட் மேயர் அவர்கள் இந்த குழுவிற்கு விருதுகளை வழங்கி கௌரவித்தார்.
