சென்னை உயர்நீதிமன்றத்தின் கூடுதல் நீதிபதியாக விக்டோரியா கவுரியை கொலிஜியம் பரிந்துரைத்தது செல்லும் என உச்ச நீதிமன்றம் நேற்று அதிரடி தீர்ப்பை வழங்கியுள்ளது.
சென்னை உயர் நீதிமன்றத்துக்கு நீதிபதிகளாக நியமிப்பதற்காக எட்டு பேரின் பெயர்களை உச்ச நீதிமன்ற கொலிஜியம் கடந்த சில வாரங்களுக்கு முன்னதாக ஒன்றிய அரசுக்கு பரிந்துரை செய்திருந்தது. அந்த பட்டியலில் உயர்நீதிமன்ற மதுரைக் கிளையில் ஒன்றிய அரசின் வழக்கறிஞராக உள்ள விக்டோரியா கவுரியின் பெயரும் இடம்பெற்றிருந்தது. இந்நிலையில் விக்டோரியா கவுரியை கூடுதல் நீதிபதியாக நியமனம் செய்த பரிந்துரைக்கு எதிராக சென்னை உயர்நீதிமன்றத்தை சேர்ந்த வழக்கறிஞர்கள் குழு உச்ச நீதிமன்றத்தில் இரண்டு ரிட் மனுக்களை தாக்கல் செய்திருந்தது.
இந்த மனுக்களானது உச்ச நீதிமன்றத்தில் நீதிபதிகள் சஞ்ஜீவ் கண்ணா மற்றும் பி.ஆர்.கவாய் ஆகியோர் அமர்வில் நேற்று அவசர வழக்காக விசாரணைக்கு வந்தது. அப்போது நீதிபதிகள், ‘‘விக்டோரியா கவுரியை உச்ச நீதிமன்றத்தின் கொலிஜியம் பரிந்துரை செய்து இரண்டு வாரங்களுக்கு மேல் ஆகிறது. ஆனால் அதற்கு எதிராக இறுதியான நேரத்தில் மனு தாக்கல் செய்து , அவரது பதவியேற்புக்கு தடை கேட்கிறீர்கள்.
மேலும் கொலிஜியம் அமைப்பிற்கு எங்களால் உத்தரவுகளையோ அல்லது வழிகாட்டுதல்களையோ தர இயலாது. அதே நேரத்தில் தற்பொழுது விக்டோரியா கவுரி கூடுதல் நீதிபதியாக தான் இருக்கின்றார். அவர் நிரந்தர நீதிபதியாக நியமிக்கும் பொழுது அதற்கு முன்பாக ஒரு வருடத்திற்கு அவருடைய செயல்பாடுகள் உச்ச நீதிமன்ற கொலிஜியம் அமைப்பால் ஆராயப்படும். மேலும் இது தற்போதைய நிலையில் விசாரணைக்கு உகந்ததும் கிடையாது எனக்கூறி மனுவை தள்ளுபடி செய்து உத்தரவிட்டனர்.
