டெல்லி மற்றும் அதைச் சுற்றியுள்ள பகுதிகளில் காற்று மாசு கடுமையாக அதிகரித்துள்ள நிலையில், இந்த பிரச்சினையை தீர்க்க செயற்கை மழை ஏற்படுத்த வேண்டும் என்று டெல்லி அரசு மத்திய அரசிடம் கோரிக்கை விடுத்துள்ளது. டெல்லி சுற்றுச்சூழல் அமைச்சர் கோபால் ராய், இதுகுறித்து மத்திய சுற்றுச்சூழல் அமைச்சர் பூபேந்திர யாதவுக்கு கடிதம் எழுதியுள்ளார்.
காற்றின் தரம் மிகவும் மோசமாகிவிட்டதால், பள்ளிகள் மூடப்பட்டு, கட்டுமானப் பணிகள் நிறுத்தப்பட்டுள்ளன. இந்த நிலையில், மேகங்களில் ரசாயனங்களை தெளித்து செயற்கையாக மழை பெய்ய வைப்பதன் மூலம் மாசுபாட்டைக் கட்டுப்படுத்தலாம் என்று டெல்லி அரசு கருதுகிறது. இது தொடர்பாக கான்பூர் ஐ.ஐ.டி.யுடன் டெல்லி அரசு ஏற்கனவே ஆலோசனை நடத்தியுள்ளது. இருப்பினும், இந்த திட்டத்தை செயல்படுத்த மத்திய அரசின் அனுமதி தேவைப்படுவதால், டெல்லி அரசு மத்திய அரசிடம் அனுமதி கோரியுள்ளது. இதற்கு மாற்றாக, ஒற்றைப்படை-இரட்டைப்படை வாகனங்கள் மட்டுமே இயக்க அனுமதிப்பது, அரசு ஊழியர்கள் வீட்டிலிருந்து பணி புரிவது போன்ற நடவடிக்கைகளையும் டெல்லி அரசு பரிசீலித்து வருகிறது.
