இந்தியா, அக்டோபர் 16, 2024 அன்று விசாகப்பட்டினத்தில் தனது 4வது அணு சக்தியால் இயங்கும் பாலிஸ்டிக் ஏவுகணை நீர்மூழ்கி கப்பலை (SSBN) அறிமுகம் செய்துள்ளது. S4* என பெயரிடப்பட்டுள்ள இந்த நீர்மூழ்கிக் கப்பல், 3,500 கிலோமீட்டர் தூரம் வரை செல்லக்கூடிய கே-4 அணு சக்தி பாலிஸ்டிக் ஏவுகணைகளை சுமந்து செல்லும் திறன் கொண்டது. இந்த நீர்மூழ்கிக் கப்பல் உள்நாட்டிலேயே உற்பத்தி செய்யப்பட்ட 75% உதிரி பாகங்களை கொண்டுள்ளது என்பது குறிப்பிடத்தக்கது.
இந்தியா ஏற்கனவே ஆகஸ்ட் மாதம் ஐஎன்எஸ் அரிகாத் என்ற அணுசக்தி நீர்மூழ்கிக் கப்பலை கடற்படையில் இணைத்துள்ளது. மேலும், 2025 ஆம் ஆண்டு ஐஎன்எஸ் அரிதாமான் என்ற மற்றொரு அணுசக்தி நீர்மூழ்கிக் கப்பல் கடற்படையில் இணைக்கப்பட உள்ளது. இதோடு நின்றுவிடாமல், இந்தோ-பசிபிக் பிராந்தியத்தில் தனது பாதுகாப்புத் திறனை மேலும் வலுப்படுத்தும் நோக்கில், மேலும் இரண்டு அணுசக்தி தாக்குதல் நீர்மூழ்கிக் கப்பல்களை உருவாக்கும் திட்டத்திற்கு மத்திய அரசு ஒப்புதல் அளித்துள்ளது. சீனாவின் டோங் ஃபெங்-21 மற்றும் 26 போன்ற நீண்ட தூர ஏவுகணைகளின் அச்சுறுத்தலுக்கு மத்தியில், இந்தியா விமானம் தாங்கி கப்பல்களை விட நீர்மூழ்கிக் கப்பல் தடுப்பிற்கு அதிக முக்கியத்துவம் அளித்து வருவது குறிப்பிடத்தக்கது.
