பஹல்காம் தாக்குதலுக்கு கடும் பதிலடி: தயார் நிலையில் இந்தியா

இந்தியா பாதுகாப்பு நடவடிக்கைகளை தீவிரமாக மேற்கொண்டு, முப்படைகளையும் போர்க்கப்பல்களையும் தயார்நிலையில் வைத்துள்ளது.

ஜம்மு காஷ்மீரின் பஹல்காம் பகுதியில் கடந்த மாதம் 22ம் தேதி நிகழ்ந்த பயங்கரவாத தாக்குதலில் 26 சுற்றுலா பயணிகள் உயிரிழந்தனர். இந்த தாக்குதலுக்கு லஷ்கர்-இ-தொய்பா அமைப்பின் கிளையான 'தி ரெசிஸ்டண்ட் பிரண்ட்' பொறுப்பேற்றது. இதனைத் தொடர்ந்து, இந்தியா 'ஆபரேஷன் சிந்தூர்' எனும் ராணுவ நடவடிக்கையை மத்திய அரசின் அறிவுறுத்தலின் பேரில் வான்வழி வழியாக தொடங்கியது. பாகிஸ்தானிலும், அதனை ஆக்கிரமித்துள்ள காஷ்மீரிலும் உள்ள பயங்கரவாத முகாம்கள் மீது டிரோன்கள் மற்றும் ஏவுகணைகள் மூலம் மத்திய இராணுவம் தாக்குதல் நடத்தியது. பாகிஸ்தானின் பகவல்பூர், முரிட்கே, சர்ஜால், சியால்கோட் உள்ளிட்ட பகுதிகள் மற்றும் ஆக்கிரமிப்பு காஷ்மீரின் பிம்பர், பர்னாலா உள்ளிட்ட பகுதிகளில் மொத்தம் 21 பயங்கரவாத அமைப்புகள் அழிக்கப்பட்டன. இதைத் தொடர்ந்து, பாகிஸ்தான் ராணுவம் எல்லையை கடந்து தாக்குதல் மேற்கொண்ட நிலையில், இந்தியா பதிலடி கொடுத்து வருகிறது. பூஞ்ச் எல்லையில் ராணுவ வீரர் தினேஷ் குமார் வீரமரணம் அடைந்தார். நிலம், கடல், ஆகாயம் என மூன்று வழிகளிலும் இந்தியா பாதுகாப்பு நடவடிக்கைகளை தீவிரமாக மேற்கொண்டு, முப்படைகளையும் போர்க்கப்பல்களையும் தயார்நிலையில் வைத்துள்ளது.