இந்திய பெண்கள் ஹாக்கி அணியின் துணை கேப்டன் வந்தனா எலும்பு முறிவு ஏற்பட்டதன் காரணமாக ஒலிம்பிக் தகுதி சுற்று போட்டியில் இருந்து விலகி உள்ளார்.
ஜார்கண்ட் தலைநகர் ராஞ்சியில் வரும் 13 ஆம் தேதி முதல் 19 ஆம் தேதி வரை பாரீஸ் ஒலிம்பிக் பெண்கள் ஹாக்கி போட்டிக்கான ஒரு தகுதி சுற்று நடைபெற உள்ளது. இதில் எட்டு அணிகள் இரண்டு பிரிவுகளாக பிரிக்கப்பட்டுள்ளது. அதில் ஏ பிரிவில் ஜெர்மனி, ஜப்பான், சிலி, செக் குடியரசு அணிகளும், பி பிரிவில் இந்தியா, இத்தாலி, அமெரிக்கா,நியூசிலாந்து அணிகளும் இடம் பிடித்துள்ளன. இதில் பதிமூன்றாம் தேதி இந்திய அணி தனது முதலாவது லீக்கில் அமெரிக்காவுடன் போட்டியிடுகிறது. ஒவ்வொரு பிரிவிலும் இரண்டு இடங்களை பிடிக்கும் அணிகள் அரை இறுதிக்கு முன்னேறும்.மூன்று இடங்களை பிடிக்கும் அணிகள் ஒலிம்பிக் போட்டிக்கு தகுதி பெறும். இந்நிலையில் இந்திய பெண்கள் ஹாக்கி அணியின் துணை கேப்டன் மற்றும் முன்கள வீராங்கணையான வந்தனா பயிற்சியின்போது ஏற்பட்ட எலும்பு முறிவின் காரணமாக இந்த தகுதி சுற்று போட்டியில் இருந்து விலகி உள்ளார். அவருக்கு பதிலாக இளம் வீராங்கனை பல்ஜீத் கபூர் அணியில் சேர்க்கப்பட்டுள்ளார். ஜார்கண்டை சேர்ந்த நிக்கி பிரதான் துணை கேப்டனாக நியமிக்கப்பட்டுள்ளார்.
