கடந்த மார்ச் மாதத்தில், இந்தியாவின் தொழிலக உற்பத்தி கடுமையான வீழ்ச்சியை பதிவு செய்துள்ளது. கடந்த 5 மாதங்களில் பதிவான மிகக் குறைவான வளர்ச்சி விகிதம் இதுவாகும். தேசிய புள்ளியியல் அலுவலகம் வெளியிட்டுள்ள அறிக்கையில் இந்த தகவல் தெரிவிக்கப்பட்டுள்ளது.
அந்த அறிக்கையின் படி, பிப்ரவரி மாதத்தில் 5.8% ஆக இருந்த நாட்டின் தொழிலக உற்பத்தி வளர்ச்சி, மார்ச் மாதத்தில் 1.1% ஆக சரிந்துள்ளது. முன்னதாக, 2022 அக்டோபர் மாதத்தில், 4.1% ஆக இருந்ததே குறைந்தபட்ச தொழிலக உற்பத்தி வளர்ச்சி என்று கூறப்படுகிறது. குறிப்பாக, மின்சாரம் மற்றும் உற்பத்தி துறைகளின் மோசமான செயல்பாடுகள் காரணமாக இந்த வீழ்ச்சி பதிவு செய்யப்பட்டுள்ளதாக நிபுணர்கள் கூறுகிறார்கள்.
துறைவாரியாக, சுரங்க உற்பத்தி 3.9% ல் இருந்து 6.8% ஆக உயர்ந்துள்ளது. அதே வேளையில், உள்கட்டமைப்பு, கட்டுமான பொருட்கள் உற்பத்தி 6.7% ல் இருந்து 5.4% ஆக சரிந்துள்ளது. நுகர்வோர் பொருட்கள் உற்பத்தி 3.1% சரிவிலிருந்து 8.4% சரிவாக பதிவாகியுள்ளது. மின் உற்பத்தி 6.1% ல் இருந்து 1.6% ஆக கடும் சரிவை பதிவு செய்துள்ளது. உற்பத்தி துறையில் 1.4% ல் இருந்து 1.9% ஆக வளர்ச்சி உயர்ந்துள்ளது.
