இஸ்ரேல்-ஈரான் மோதலுக்குப் பிறகு மூடப்பட்ட வான்வெளி, தற்போது பாதுகாப்பு மதிப்பீடுகளை தொடர்ந்து மீண்டும் திறக்கப்பட்டுள்ளது. சில பகுதிகள் மட்டும் தற்காலிகமாக மூடப்பட்டுள்ளன.
ஜூன் 13-ம் தேதி இஸ்ரேலின் வான்வழித் தாக்குதல்களுக்கு எதிராக, ஈரான் தனது மத்திய மற்றும் மேற்குப் பகுதிகளில் வான்வெளியை மூடியது. தற்போது இரு நாடுகளும் போர் நிறுத்த ஒப்பந்தம் மேற்கொண்ட நிலையில், ஈரானின் சாலைகள் மற்றும் நகர மேம்பாட்டு அமைச்சகம், வான்வெளி மீண்டும் திறக்கப்படுவதாக அறிவித்துள்ளது. சிவில் விமானப் போக்குவரத்து அமைப்பின் பாதுகாப்பு மதிப்பீடு முடிவடைந்ததை அடுத்து இந்த முடிவு எடுக்கப்பட்டுள்ளது. நாட்டின் கிழக்கு பகுதியில் விமான போக்குவரத்து ஏற்கனவே அனுமதிக்கப்பட்டு இருந்தாலும், வடக்கு, தெற்கு மற்றும் மேற்குப் பகுதிகளில் உள்ள விமான நிலையங்கள் ஞாயிற்றுக்கிழமை 2 மணி வரை மூடப்பட்டிருக்கும் என CAO தெரிவித்துள்ளது.
