ஐரோப்பிய விண்வெளி ஏஜென்சி (ESA) சார்பாக உருவாக்கப்பட்ட ப்ரோபா-3 என்ற விண்கலத்தை இந்திய விண்வெளி ஆராய்ச்சி நிறுவனம் (இஸ்ரோ) இன்று வெற்றிகரமாக விண்ணில் செலுத்தியுள்ளது. ஆந்திர மாநிலம் ஸ்ரீஹரிகோட்டாவில் இருந்து, மாலை 4:04 மணிக்கு இந்த விண்கலம் விண்ணில் ஏவப்பட்டது. செயற்கைக்கோள் உந்துவிசை ஒழுங்கின்மை காரணமாக நேற்று நிர்ணயிக்கப்பட்ட ஏவுதல் இன்றைக்கு ஒத்திவைக்கப்பட்டிருந்தது. தற்போது, இந்தப் பணி வெற்றிகரமாக நிறைவேற்றப்பட்டுள்ளது.
ப்ரோபா-3 விண்கலம் இரண்டு பகுதிகளைக் கொண்டது. கரோனாகிராஃப் மற்றும் ஆக்ல்டர் எனப்படும் இந்த இரண்டு பகுதிகளும் ஒன்றிலிருந்து ஒன்று 150 மீட்டர் தொலைவில் பறந்து செல்லும். இதன் மூலம் செயற்கை கிரகணம் ஏற்படுத்தப்பட்டு, சூரியனின் வெளிப்புற பகுதியான கொரோனா பகுதியை விஞ்ஞானிகள் ஆய்வு செய்ய முடியும். சூரியனின் வெப்பம் அதிகமாக இருப்பதற்கான காரணம் மற்றும் விண்வெளி வானிலையில் இது எவ்வாறு தாக்கத்தை ஏற்படுத்துகிறது என்பது குறித்த முக்கியமான தகவல்களை இந்த ஆய்வு மூலம் பெற முடியும். இதன் மூலம் சூரியனைப் பற்றிய ஆய்வில் ஒரு புதிய அத்தியாயம் தொடங்கும் என எதிர்பார்க்கப்படுகிறது.
