உலகில் மிகச் சிறப்பாக செயல்படும் தலைவர்கள் பட்டியலில் 78% பேரின் ஆதரவுடன் இந்திய பிரதமர் நரேந்திர மோடி முதலிடம் பிடித்துள்ளார்.
சர்வதேச அளவில் மிகச் சிறப்பாக செயல்டும் தலைவர்கள் குறித்து அந்தந்த நாடுகளின் மக்களிடம் ‘மார்னிங் கன்சல்ட்' நிறுவனம் கருத்துக்கணிப்பு நடத்தி முடிவுகளை வெளியிட்டு வருகிறது. அந்த வகையில் கடந்த ஜனவரி 26 முதல் 31-ம் தேதி வரை உலகின் மிக முக்கியமான 22 நாடுகளின் தலைவர்கள் குறித்து தரவரிசை பட்டியலை வெளியிட்டுள்ளது. இந்த பட்டியலில் இந்திய பிரதமர் நரேந்திர மோடி முதலிடத்தில் உள்ளார்.
இந்தியாவில் நடத்தப்பட்ட கருத்துக் கணிப்பில் 78 சதவீதம் பேர் பிரதமர் மோடிக்கு ஆதரவாக வாக்களித்துள்ளனர். 18 சதவீதம் பேர் மட்டும் எதிர்த்து வாக்கினை பதிவு செய்துள்ளனர். மெக்ஸிகோ அதிபர் லோபஸ் ஒபரடோர் 2-வது இடத்தில் உள்ளார். சுவிட்சர்லாந்து அதிபர் ஆலைன் பெர்செட் 3-வது இடத்தில் உள்ளார். ஆஸ்திரேலிய அதிபர் அந்தோணி அல்பேன்ஸ் 4-வது இடத்தைப் பிடித்துள்ளார். பிரேசில் அதிபராக லூயிஸ் இனாசியோ லூலா டா சில்வா 5-வது இடத்தை பெற்றுள்ளார். அமெரிக்க அதிபர் ஜோ பைடன் தரவரிசை பட்டியலில் பின்தங்கி 7-வது இடத்தில் உள்ளார்.
