அக்டோபர் 1 முதல் ரயில் டிக்கெட் முன்பதிவு செய்ய, முதல் 15 நிமிடங்களுக்கு ஆதார் கட்டாயம் என இந்திய ரயில்வே அறிவித்துள்ளது.
ரயில் டிக்கெட் முன்பதிவில் வெளிப்படைத்தன்மையை அதிகரிக்கவும், முறைகேடுகளைத் தடுக்கவும் இந்திய ரயில்வே ஒரு புதிய விதியை அமல்படுத்தியுள்ளது. அக்டோபர் 1, 2025 முதல், ரயில் டிக்கெட் முன்பதிவு தொடங்கும் முதல் 15 நிமிடங்களுக்கு ஆதார் கட்டாயம் என அறிவிக்கப்பட்டுள்ளது. இதன்படி, பயணத்திற்கான முன்பதிவு திறக்கப்பட்ட முதல் 15 நிமிடங்களில் டிக்கெட் பதிவு செய்ய, IRCTC கணக்குடன் ஆதார் இணைக்கப்பட்டிருக்க வேண்டும். ஆதார் இணைக்காதவர்கள் இந்த நேரத்தில் முன்பதிவு செய்ய முடியாது.
உதாரணமாக, ஒரு ரயிலுக்கான முன்பதிவு காலை 8 மணிக்குத் தொடங்கினால், 8:00 முதல் 8:15 மணி வரை ஆதார் சரிபார்க்கப்பட்ட பயனர்கள் மட்டுமே டிக்கெட் எடுக்க முடியும். அதிக தேவை உள்ள நேரத்தில் உண்மையான பயணிகளுக்கு முன்னுரிமை அளிக்கவே இந்த நடவடிக்கை எடுக்கப்பட்டுள்ளதாக ரயில்வே அதிகாரிகள் தெரிவித்துள்ளனர். தற்போது தட்கல் டிக்கெட்டுகளுக்கு மட்டும் அமலில் இருந்த இந்த விதி, இப்போது அனைத்து பொது முன்பதிவுகளுக்கும் நீட்டிக்கப்பட்டுள்ளது.
