இந்தியாவின் மிகப்பெரிய தனியார் துறை நிறுவனங்களில் ஒன்றான ரிலையன்ஸ் இண்டஸ்ட்ரீஸ், தனது ஜியோமார்ட் தளம் மூலம் நவி மும்பை மற்றும் பெங்களூருவில் துரித வர்த்தக சேவையை தொடங்கியுள்ளது. பிளிங்கிட், ஸ்விக்கி இன்ஸ்டாமார்ட் மற்றும் பிக்பாஸ்கெட் போன்ற நிறுவனங்களுக்கு நேரடி போட்டியாக இது அமைந்துள்ளது. முதற்கட்டமாக, தனது 3000 கடைகளில் இருந்து மளிகைப் பொருட்களை விற்பனை செய்யத் தொடங்கியுள்ளது.
இம்மாத இறுதிக்குள் இந்தியா முழுவதும் இந்த சேவையை விரிவுபடுத்த திட்டமிட்டுள்ள ரிலையன்ஸ், 10 முதல் 15 நிமிடங்களில் பொருட்களை வாடிக்கையாளர்களின் வீட்டுக்கு டெலிவரி செய்யும் என்று கூறியுள்ளது. இதற்காக, தனது தளவாட சேவையான Grab-ஐ பயன்படுத்த உள்ளது. மேலும், டெலிவரி கட்டணம் அல்லது பிளாட் ஃபார்ம் கட்டணம் எதுவும் வசூலிக்கப்படாது என்பது குறிப்பிடத்தக்கது. இந்தியாவில் உள்ள 1,150 நகரங்கள் மற்றும் சிறிய நகரங்களில் இந்த சேவையை வழங்க திட்டமிட்டுள்ள ரிலையன்ஸ், போட்டியாளர்களை விட அதிகமான, சுமார் 10,000 முதல் 12,000 வரை பல்வேறு வகையான பொருட்களை வழங்கும் என்று தெரிவித்துள்ளது.
