சபரிமலை பக்தர்களுக்கான சிறப்பு பேருந்துகள் இயக்கப்பட உள்ளன.
தமிழ்நாடு அரசு போக்குவரத்து கழகத்தின் மேலாண்மை இயக்குனர் மோகன் வெளியிட்ட செய்தியின்படி, சபரிமலை ஐயப்பன் கோவிலுக்கு செல்வோரின் எண்ணிக்கை அதிகரித்து வருகிறது. அதன் காரணமாக, மண்டல பூஜை மற்றும் மகர விளக்கு திருவிழாக்களின் போது, பக்தர்களுக்கான சிறப்பு பஸ்கள் இயக்கப்படுகின்றன. அதன்படி இந்த வருடம், 15-ந்தேதி (வெள்ளிக்கிழமை) முதல், ஜனவரி 16-ந்தேதி வரை, சென்னை, கோயம்பேடு, கிளாம்பாக்கம், திருச்சி, கடலூர், மதுரை, புதுச்சேரி ஆகிய இடங்களில் இருந்து பம்பைக்கு அதிநவீன மிதவை பஸ்கள் மற்றும் ஏ.சி. இல்லா, படுக்கை வசதி கொண்ட பஸ்கள் இயக்கப்படுவதாக அறிவிக்கப்பட்டுள்ளது. அதிகபட்ச பக்தர்கள் பயணம் செய்யவிருப்பதால், குறைந்த நேரத்தில் கூடுதலாக பஸ்கள் இயக்கப்படுவதாக தெரிவிக்கப்பட்டுள்ளது. இதன் மூலம் குழுவாக செல்லும் பக்தர்களுக்காக வாடகை அடிப்படையில் பஸ்கள் வழங்கப்படும். முன்பதிவுக்கு www.tnstc.in இணையதளம் மற்றும் தமிழ்நாடு அரசு போக்குவரத்து கழக செயலி பயன்படுத்த முடியும். மேலும், பயணிகள் 9445014452, 9445014424, 9445014463 என்ற எண்களில் தொடர்பு கொண்டு, பஸ்கள் மற்றும் முன்பதிவுகளின் விவரங்களை அறியலாம்.
