முஸ்லிம் சமூகத்தில் பழக்கத்தில் உள்ள 'தலாக்' நடைமுறைகள் குறித்து மத்திய அரசு பதில் அளிக்கும்படி உச்ச நீதிமன்றம் உத்தரவிட்டது.
முஸ்லிம் பெண்களை அவர்களது கணவர்கள் மூன்று முறை தலாக் கூறி, ஒருதலைப்பட்சமாக விவாகரத்து செய்யும் நடைமுறையை உச்ச நீதிமன்ற அறிவுரைப்படி மத்திய அரசு சட்டம் இயற்றி ஏற்கனவே தடை செய்துள்ளது. இந்நிலையில், வேறு பெயர்களில் இது போன்ற நடைமுறைகள் தொடர்வதாக புகார்கள் எழுந்து உள்ளன.
கர்நாடகாவைச் சேர்ந்த சயதா அம்ப்ரீன் என்பவர் உச்ச நீதிமன்றத்தில் மனு தாக்கல் செய்துள்ளார். அதில், கடந்த ஜனவரியில் எங்கள் சமூக தலைவரான காஸி அலுவலகத்தில் இருந்து, எனக்கு ஒரு கடிதம் வந்தது. என் கணவர் சார்பில் அனுப்பப்பட்ட அந்த கடிதத்தில், என் மீது தெளிவற்ற குற்றச்சாட்டுகள் சுமத்தப்பட்டு இருந்தன. அதன் அடிப்படையில் இந்த திருமண வாழ்க்கை நீடிக்காது என்றும், இந்த திருமண பந்தத்தில் இருந்து நான் விடுவிக்கப்படுவதாகவும் குறிப்பிடப்பட்டு இருந்தது. இதுபோல ஒரே ஒரு கடிதம் வாயிலாக திருமண பந்தத்தை முறித்துக் கொள்வது, 'தலாக் - இ - கினயா' என்றும், 'தலாக் - இ - பெயின்' என்றும் அழைக்கப்படுகின்றன.
இதனால் முஸ்லிம் பெண்கள் உடல் ரீதியாகவும், சமூக, பொருளாதார மற்றும் உணர்வு ரீதியான பிரச்னைகளுக்கும் ஆளாகின்றனர். இது அரசியலமைப்புக்கு எதிரானது என்று அறிவிக்க உச்ச நீதிமன்றம் உத்தரவிட வேண்டும் என்று கூறப்பட்டுள்ளது.
இந்த மனு, நீதிபதிகள் எஸ்.ஏ.நசீர், ஜே.பி.பார்திவாலா அடங்கிய அமர்வு முன் நேற்று விசாரணைக்கு வந்தது. இந்த மனு மீது பதில் அளிக்கும்படி மத்திய சட்டத்துறை, சிறுபான்மையினர் விவகாரத் துறைகளுக்கு நீதிபதிகள் உத்தரவிட்டனர்.
