58 நாடுகளுக்கு இ-விசா மூலம் பயணம் செய்யலாம் என வெளியுறவு அமைச்சகம் அறிவிப்பு வெளியிட்டுள்ளது.
மாநிலங்களவை உறுப்பினர் ஒருவர், இந்திய பாஸ்போர்ட்டின் தரவரிசை மற்றும் விசா இல்லாத பயணம் தொடர்பான கேள்வி எழுப்பியிருந்தார். இதற்கு வெளியுறவு விவகாரங்கள் இணை மந்திரி கீர்த்தி வர்தன்சிங் எழுத்துப்பூர்வமாக பதில் அளித்தார். அவர் கூறியபடி, உலகம் முழுவதும் பாஸ்போர்ட்டுக்கு தரவரிசை வழங்கும் சில தனியார் நிறுவனங்கள் உள்ளன. அவை தீர்மானிக்கும் அளவுருக்கள் இருந்தாலும், பரவலாக ஏற்றுக்கொள்ளப்பட்ட தரவரிசை முறை எதுவும் இல்லை.
இதன் படி, இந்திய பாஸ்போர்ட்டுக்கு 26 நாடுகள் (அங்கோலா, தாய்லாந்து, நேபாளம், பூடான், மலேசியா, மாலத்தீவு, செர்பியா, பிலிப்பைன்ஸ், ருவாண்டா உள்ளிட்டவை) விசா இல்லாத நுழைவை வழங்குகின்றன. 40 நாடுகள் "ஆன்-அரைவல்" வசதியை (கிளம்பிச்செல்லும் தருவாயில் பெற்றுக்கொள்ளலாம்) வழங்குகிறது. இவற்றை வெளிப்படுத்தும் பட்டியல் வெளியுறவு அமைச்சகத்தின் இணையதளத்தில் கிடைக்கிறது. மேலும், 58 நாடுகளுக்கு இ-விசா மூலம் பயணம் செய்ய முடியும் என்றும் தெரிவிக்கப்பட்டுள்ளது.
