இந்தியாவில் விரைவு வர்த்தகத் துறையில் கடும் போட்டி நிலவி வருகிறது. இந்த போட்டியில் ஜெப்டோ நிறுவனம் தனது பங்கை அதிகரிக்க பல்வேறு முயற்சிகளை மேற்கொண்டு வருகிறது. இந்த முயற்சிகளில் ஒன்றாக, வாடிக்கையாளர்களை ஈர்க்கும் பொருட்டு ஜெப்டோ நிறுவனம் அதிக அளவில் செலவு செய்து வருகிறது. குறிப்பாக, டிஜிட்டல் மார்க்கெட்டிங்கில் அதிக முதலீடு செய்து வருகிறது. மேலும், ஐபோன் போன்ற பிரபலமான பொருட்களுக்கு அதிக அளவில் தள்ளுபடி வழங்கி வருகிறது.
இந்தியாவின் பல பணக்காரர்களிடம் இருந்து 2,500 கோடி ரூபாய் நிதியுதவி பெற்ற பிறகு, ஜெப்டோ நிறுவனம் தனது செயல்பாடுகளை வேகமாக விரிவுபடுத்தி வருகிறது. இதற்காக மாதந்தோறும் 250 கோடி ரூபாய்க்கும் அதிகமான தொகையை செலவு செய்கிறது. இது கடந்த மே மாதத்தை விட ஆறு மடங்கு அதிகம் என்பது குறிப்பிடத்தக்கது. இவ்வளவு அதிகமாக செலவு செய்தாலும், Zepto நிறுவனத்தின் 70% கடைகள் லாபம் ஈட்டி வருவதாக நிறுவனத்தின் தலைமை நிர்வாக அதிகாரி கூறியுள்ளார். மேலும், வரும் காலங்களில் நிறுவனத்தின் வருவாய் 200% வரை அதிகரிக்கும் என்றும் அவர் நம்பிக்கை தெரிவித்துள்ளார்.
