இந்திய விண்வெளி ஆராய்ச்சி நிறுவனம் மாற்றுத்திறனாளிகளுக்கு செயற்கை ஸ்மார்ட் கால் உறுப்பை உருவாக்கியுள்ளது. இது விரைவில் வணிக பயன்பாட்டிற்காக தயாரிக்கப்படலாம்.
இது நுண்செயலியால் கட்டுப்படுத்தப்பட்ட முழங்கால்கள் (MPKs) என அழைக்கப்படுகிறது, இது ஊனமுற்றோருக்கு நீட்டிக்கப்பட்ட திறன்களை வழங்குகிறது. ஏறக்குறைய 1.6 கிலோகிராம் எடை கொண்ட ஸ்மார்ட் முழங்கால், ஒரு ஊனமுற்றவரை குறைந்தபட்ச ஆதரவுடன் சுமார் 100 மீட்டர் தூரம் நடக்கச் செய்கிறது.
இந்த ஸ்மார்ட் முழங்கால்கள் விக்ரம் சாராபாய் விண்வெளி மையம் (VSSC), லோகோமோட்டர் குறைபாடுகளுக்கான தேசிய நிறுவனம் (NILD), உடல் ஊனமுற்ற நபர்களுக்கான தீன்தயாள் உபாத்யாயா தேசிய நிறுவனம் மற்றும் இந்திய செயற்கை மூட்டு உற்பத்தி கழகம் (ALIMCO) உடன் புரிந்துணர்வு ஒப்பந்தத்தின் கீழ் உருவாக்கப்படுகின்றன.
இந்த ஸ்மார்ட் லிம்ப் - நுண்செயலி, ஹைட்ராலிக் டம்பர், லோட் மற்றும் முழங்கால் கோண உணரிகள், கூட்டு முழங்கால்-கேஸ், லி-அயன் பேட்டரி, மின் சேணம் மற்றும் இடைமுக கூறுகள் ஆகியவற்றை கொண்டுள்ளது என்று இஸ்ரோ தெரிவித்துள்ளது. இது சென்சார் தரவுகளின் அடிப்படையில் நடையின் நிலையைக் கண்டறியும். மேலும் இதிலுள்ள கட்டுப்பாட்டு மென்பொருள் கணினியின் விறைப்பை மாற்றுவதன் மூலம் விரும்பிய நடையை அடைய மாறுதல்கள் செய்ய முடியும்.
இஸ்ரோ நிறுவனம் நடைபயண சோதனைகளை நடத்துவதற்காக கூட்டு திட்ட கண்காணிப்பு குழுவின் அனுமதியைப் பெற்ற பிறகு, ஒரு ஊனமுற்றவர் மூலம் இக்கருவியை சோதித்தது. இணையான கம்பிகளின் ஆதரவுடன் ஆரம்ப நடைப்பயிற்சி சோதனைகள் நடத்தப்பட்டன. அதன்பின், கால் ஊனமுற்றவர் குறைந்தபட்ச ஆதரவுடன் நடைபாதையில் சுமார் 100 மீட்டர் நடந்தார். முழங்காலின் அனைத்து துணை அமைப்புகளும் திருப்திகரமாக செயல்பட்டன. இவ்வாறு இந்திய விண்வெளி நிறுவனம் கூறியுள்ளது.
மேலும் இந்த புதிய தொழில்நுட்பத்தின் விலை ரூ.4-5 லட்சம் என மதிப்பிடப்பட்டுள்ளதாகவும், தற்போது கிடைக்கும் முழங்கால்களின் விலை ரூ.10-60 லட்சம் எனவும் இஸ்ரோ தெரிவித்துள்ளது.
