சென்னையைத் தளமாகக் கொண்ட ஸ்டார்ட்அப் நிறுவனமான அக்னிகுல் காஸ்மோஸ் நிறுவனத்துக்கு இந்திய அரசின் அறிவியல் மற்றும் தொழில்நுட்ப அமைச்சகம் மற்றும் தொழில்நுட்ப மேம்பாட்டு வாரியத்தின் ஆதரவு கிடைத்துள்ளது.
சுமார் 45 முன்னாள் இஸ்ரோ விஞ்ஞானிகள் தலைமையில் செயல்படும் அக்னிகுல் நிறுவனம் உருவாக்கியுள்ள அக்னிபான் என்ற இரண்டு நிலை ராக்கெட், 300 கிலோ எடையுள்ள செயற்கைக்கோள்களை 700 கிலோமீட்டர் உயரத்திற்கு செலுத்தும் திறன் கொண்டது. இந்த ராக்கெட்டின் சிறப்பம்சம் என்னவென்றால், செயற்கைக்கோள் ஏவுவதற்கான நேரத்தை இரண்டு வாரங்களாக குறைக்க முடியும் என்பதுதான். மேலும், 3டி அச்சு தொழில்நுட்பத்தைப் பயன்படுத்தி தயாரிக்கப்பட்ட இயந்திரம் மற்றும் மொபைல் ஏவுதள அமைப்பு ஆகியவை இந்த ராக்கெட்டை நெகிழ்வானதாகவும், வேகமாகவும், மலிவு விலையிலும் செயல்பட வைக்கிறது. முன்னதாக, அக்னிபான் எஸ்ஓஆர்டிஇடி ராக்கெட்டை அக்னிகுல் நிறுவனம் வெற்றிகரமாக விண்ணில் செலுத்தியது குறிப்பிடத்தக்கது.
