கடந்த மே மாதம் 23ம் தேதி, டோக்கியோவில், இந்தோ பசிபிக் பொருளாதாரக் கூட்டமைப்பின் தொடக்க விழா நடைபெற்றது. இதில் அமெரிக்கா, ஜப்பான், இந்தியா, ஆஸ்திரேலியா ஆகிய நாடுகளின் தலைவர்கள் கலந்து கொண்டனர். இந்தக் கூட்டமைப்பின் உறுப்பு நாடுகள் இந்தோ பசிபிக் பிராந்தியத்தின் வர்த்தக நெறிகளை ஒருங்கிணைத்து வகுக்கின்றன. இந்நிலையில் இந்த மாநாட்டின் மெய்மேக்கர் மாநாடுகள் ஜூலை மாதத்தில் நடைபெற்றன. முதல் நேரடி மாநாடு லாஸ் ஏஞ்சல்ஸில் நடைபெறுகிறது.
இந்த மாநாட்டில் பேசிய அமெரிக்காவின் வர்த்தகத் தூதர் கேத்தரின் தாய், "இந்தோ பசிபிக் பொருளாதார கூட்டமைப்பின் நான்கு வர்த்தகத் தூண்களில் ஒன்றாக இந்திய நாடு இம்முறை இணையவில்லை" என்று கூறினார். மேலும், இந்திய வர்த்தக அமைச்சர் பியுஷ் கோயலுடன் இருநாட்டு வர்த்தக உறவு குறித்து பேச்சுவார்த்தையில் ஈடுபட்டதாகவும், இந்த வருட இறுதியில் மற்றொரு சந்திப்பு நிகழும் என்றும் கூறினார்.
இந்த மாநாட்டில் கலந்து கொள்வதற்காக, 6 நாள் பயணமாக, பியுஷ் கோயல் சான் பிரான்சிஸ்கோ சென்றுள்ளார். இது குறித்து பேசிய அவர், இந்தோ பசிபிக் வர்த்தகக் கூட்டமைப்பில் இணைவதற்கான மசோதா இந்திய நாடாளுமன்றத்தில் விரைவில் தாக்கல் செய்யப்படும் என்று கூறினார். அத்துடன், இந்தக் கூட்டமைப்பின் பல்வேறு திட்டங்கள் மற்றும் அம்சங்களில் இணைவதற்கு, தேசிய நலனைக் கருத்தில் கொண்டு இந்தியா முடிவெடுக்கும் என்று தெரிவித்தார். மேலும், தகவல் பாதுகாப்புடன் கூடிய, டிஜிட்டல் உலகத்திற்கான புதிய சட்டத்தை இயற்ற இந்தியா முயற்சித்து வருகிறது என்று கூறினார்.
தொடர்ந்து, அமெரிக்க வர்த்தகத் துறையின் பிரதிநிதி கேத்தரின் தாய் மற்றும் செயலாளர் கினா ரோய்மொண்டோ ஆகியோரை சந்தித்ததாகவும், இந்தியாவுடன் வர்த்தகத் தொடர்பை நீட்டித்துக் கொள்வதற்கு அவர்கள் விருப்பம் தெரிவித்துள்ளதாகவும் அவர் கூறினார். ஏற்கனவே, அமெரிக்காவிற்கு தொழில்நுட்பம் சார்ந்த சேவைகளை வழங்குவதில் இந்தியா முன்னிலை வகிக்கிறது. இந்நிலையில், இரு நாடுகளுக்கிடையிலான உயர் தொழில்நுட்பம் சார்ந்த வர்த்தகம் மேன் மேலும் வளர்ச்சி அடையும் என்று கூறினார்.
