சீனாவின் சாங்கே-6 விண்கலம் சந்திரனின் இருண்ட பகுதியிலிருந்து சேகரித்து வந்த பாறைகளை ஆய்வு செய்த விஞ்ஞானிகள், அந்தப் பகுதியில் எரிமலை வெடிப்பு நேர்ந்ததை உறுதி செய்துள்ளனர். சாங்கே-6 விண்கலம் சேகரித்த பாறைகள் சுமார் 2.8 பில்லியன் ஆண்டுகளுக்கு முன்பு எரிமலை வெடிப்பின் போது உருவானவை என்பது உறுதியாகி உள்ளதாக நேச்சர் ஆய்விதழில் குறிப்பிடப்பட்டுள்ளது.
இந்த கண்டுபிடிப்பு விஞ்ஞானிகளிடையே பெரும் பரபரப்பை ஏற்படுத்தியுள்ளது. ஏனெனில், இதுவரை சந்திரனின் இருண்ட பகுதியில் இவ்வளவு இளைய எரிமலை பாறைகள் இருக்கும் என்று யாரும் எதிர்பார்க்கவில்லை. இதற்கு முன்பு அப்பல்லோ மற்றும் லூனா விண்கலங்கள் மூலம் சந்திரனின் வெளிச்சம் படும் பகுதியிலிருந்து சேகரிக்கப்பட்ட பாறைகள் 3 பில்லியன் ஆண்டுகளுக்கு மேலானவை. ஆனால், சாங்கே-6 விண்கலம் கொண்டு வந்த பாறைகளில் கதிரியக்க கூறுகள் குறைவாக இருப்பது விஞ்ஞானிகளை குழப்பத்தில் ஆழ்த்தியுள்ளது. இது சந்திரனின் உள் அமைப்பு மற்றும் எரிமலை செயல்பாடுகள் குறித்து புதிய கேள்விகளை எழுப்பியுள்ளது.
